لنركض عراة...

إي لنركض عراة..!!

لا تستغربوا العنوان وبرجع وبأكد لنركض عراة خلونا ولو لمرة وحدة نشلح طائفتنا ، وانتمائنا السياسي وحرفتنا، ونشلح اعمارنا، ووجهتنا ، ونركض بس مع اسامينا، هيدا علي ، جنبو عمر، هونيك جوزيف ،حدو روني ، فاطمة ، جنب مايا ، وجانيت ، ورا ، عائشة .

خلو الصليب بالبيت ، واتركوا القران ع سجادة الصلاة اشلحوا الربطة الخضرا ، وخبوا الوشم الى ع الزند، لا دشداشة قصيرة ، ولا عمامة ع الراس

خلونا ولو لمرة وحدة نركض موحدين ، بلا ما يميزنا شي إلا انسانيتنا ، ومحبتنا ، وارزتنا ، ووطنيتنا

وما تخافوا كل واحد ديانتو لابسة قلبو وما في حدا بيقدر يشلحوا ديانتو الا اذا هو خلعها..

ف.. مش مهم شو لابس بس تحارب عدوك، مش مهم لما توصل للنصر تكون تيابك وسخة، او وملياني تراب او مخزقة، المهم انك وصلت وعرفت ترجع حريتك وما تكون عبد لحدا..

الله ما بينعرف بالاديان وبس، الله بينعرف من وردة بمزهرية، من خلوتك بالفي وانت عم تراقب الشمس وهي عم تغرب ، من حبة عنب حلوة بتمك ، من لمسة ايد خيك ، من حنان امك ، من عصفور عم يغرد ع شباكك

من سؤال جارك عنك ، من غريب بيعطيك محرمة لتمسح دموعك ، من جمعتك ولمتك ع طاولة فيها احبابك ، واصحابك ، هيدا بيشرب شاي وهيدا قهوة هيدا بيحب المخلوطة وهيدا بيعشق المتي هيدا بيشرب أرجيلة وهيدا بيدخن بنختلف بإذواقنا بس بتلمنا العاطفة والانسانية والمحبة

لهيك خلونا نركض بلا شي متل ما الله خلقنا ع الفطرة لابسين الحب والاحترام والمسامحة والغفران ونركض سوا ايد بآيد ع تراب الوطن ، حفاة أو بأحذية بصندل او ب سبدرين ، بكرافت ، او بكنزة، بحجاب او بشعر مربوط بشريطة حمرا ، وصدقوني ما في سلام بيضل اذا في ناس بتتنأوز شو في تحت التنورة، وكيف شكل ها البنت بلا حجاب، ويمكن هيدا احلى بلا لحية وهيدا نيالو ما بيترك فرض صلاة ، وهيدا الله لا يوفئو مش فرقاني معو شي .، وهيدا يبعتلوا حمى ما كيف مطول شعراتو ، وهيدي عاملة حالها فهمانة .ليك ليك شو لابسة ، ما معترى شو بتاكل ع الترويقة.منين جاب مصارى لعمر ها البيت ؟؟؟

،لك كل واحد حر بحالو اذا ما عم يأذي حدا .. اتركوا الحكم ل الله ..العبادة بتخص الشخص مع ربو ما في شي بيدوم بالإجبار واذا ما رغبنا الشي بقناعتنا راح نكرهو اكتر. ف. خلونا نركض كيف ما بدنا الطريق بيساع كل الناس وكل الطوايف ولو خسرنا او ربحنا بنضل اخوة بالانسانية ما بيفرقنا لا متر قماش ولا هوية.. ولا تكبروا القصة .. وقد ما فيكم صغروا لحكاية ما بدها ها القد.

مواضيع ذات صلة:

بلدية الخيام ذكورية.. ترضخ للإملاءات وتمنع الاختلاط

بلدية الخيام تمنع المرأة من المشاركة بسباق حرمون

مدرسة ابو عبدو كانت مختلطة

لن تخصع المرأة الخيامية لقوانين متطرفة

إسمالله تكمركن على هيك بلدية

حقوق المرأة في الخيام

مدرسة ابو عبدو كانت مختلطة

مدرسة ابو عبدو كانت مختلطة

يا حيف

تحية لكل إمرأة في بلادي

المخلوطة الممنوعة

الخيام... مجالس البلديات لا تلغي الثقافة والهويات

ما كان يجب أن يصل بنا الأمر الى ما وصل اليه

توضيح من جمعية سيدات الخيام‎

بين قرار البلدية من موضوع الإختلاط والموقف من المقاومة

منى عبدالله.. يا جبل ما يهزّك ريح

قرار بلدية الخيام الذكورية

غلطة الشاطر بألف يا ريّس

وجهة نظر

ماراتونيات خيامية

عودة الجاهلية

الرياضة ليست عيبا أو من المحرمات

عن حزب الله والتقدّم الاجتماعي

كم نحتاج إلى الحكمة

انا بنت الخيام... سأعانق الفائز

هل الإختلاط جائز؟

لنركض عراة