يمكن الطيور بشكل عام حالها اصعب من أحوال هالشعب المعتّر، مع إنها مش بحاجة للكهربا...ولا المواصلات... ولا كل شي بيشكي منّو اللبناني...ومع الأسف صارت الطيور نادرة.. قسم منها تهجّر خايف من الصيّادين وقسم من تلوّث البيئة...وقسم من القضاء على الشجر. واليوم كتبت عن عصفور بنى عشّو بشجرة.. وكل سنة

بصيّف عنّا..وبموسم جاب عيلتو...وما لاقى الشجرة البنى فيها عشّو

طب ساكت من القهر؟؟؟؟

نهاية عصفور

عصفور من زمان بنى عِشّو

وكل سنة بيزيد قشّة على قشّو

وما بيتركو..الولاد ولأحفاد جايين

إبن آدم مش القدر هوّي إللي غشّو

وبكل موسم بيعود رافع الراس

وبكل ثقة قال للأحفاد مشّو

مبسوط راجع عالسهل والميّات

وعا بيت بدموع العين رشّو

خايف عليه من حسد إنسان

قطع الشجرة ومن البيت كشّو

شوفوا معي كيف حالة العصفور؟

مات الحلم والخلق ....بيفشّو؟

إتطلّع برب السما والقلب مجروح

ومن القهرإجا الموت.....أشّو؟؟؟