شو هي النبطية؟!

لم تكن النبطية محجّة القرى المجاورة فقط ، هي محجة الجنوبيين من حدود فلسطين حتى جسر سينيق (مدخل صيدا الجنوبي). النبطية كانت وما زالت وستبقى مكة جبل عامل.

النبطية هي المدرسة في وقت عزّت فيه المداس.

بدّك تعلّم ابنك ؟ ابعتو على النبطية. حتى من قاطعيي النهر ( كما كانوا يسمّونه). استأجرلو قوضة (غرفة) بحي السراي هوّي ورفقاتو.

بدك لحمة للفراكة؟! ما عليك إلا بسوق اللحم بالنبطية والبدوي كحيل وأبو اللحم...

بدّك إسكافي آدمي وشاطر حتى تصلّح مشّايتك (حذاءك) او تفصّل وحدي جديدة؟! فيه (اسكافي) ( كندرجي) آدمي (قمة الأودمة)، طاهر بياخذ بحق الله... هوي الحاج محمد سلوم (أبو منيف) الذي رفض استقبال جثّة إبنه العميل ابّان الاحتلال. الكل بيعرفو للحاج بو منيف، حد مدخل جامع حي السراي.

بدك تحلّي درسك (ضرس) ؟! النبطية فيها الحلو العربي ، المشبّك والنمّورة والصفوف والعوّامة... والقحاطة (بقايا الحلو).

بدّك تحضر سينما؟! امشي على النبطية (الريفولي والكابيتول).

بدّك خبز كميج (خبز الفرن في أيامنا هذه) او مشطاح في شهر رمضان؟! فز على النبطية فيها فران.

بدّك تلاقي كل ما تحتاجه؟! ما إلك إلا سوق النبطية يوم الإثنين (مقصد كل الجنوبيين تُجّاراً ومُتسوّقين).

بدّك حمارة أو كديش ؟! آل سلّوم بانتظارك على البيدر (كان أهل القرى يُطلقون عليها قطعة الدبّانة نسبة لأصحابها) ، ساحة عاشوراء في وقتنا الحاضر.

بدّك تقطع تزكرة ( بطاقة هوية) ؟! يالله على السرايا بالنبطية.

أنت مريض وبدّك حكيم (طبيب) شاطر؟! أبو حسن (الدكتور علي غندور) بلاقيك بميت أهلا وسهلا وهوي عم يبتسم...

بدّك تروح على صيدا أو صور أو بيروت؟ إيه بتلاقي سيارة أو بوسطة ناطرتك قدام كراج المقدم او كراج الاتحاد لصاحبه المرحوم حسن شريف (السيد حسن بدر الدين) وأبو يوسف عم بنادي: "عبيروت.. عبيروت"...

بدّك تشتري كتب لأولادك في بداية العام الدراسي وكل ما يلزم من قرطاسية؟! ناطرك الحاج حجازي اللطيف... في مكتبته ، مكتبة حجازي. ما بتضّيع ، بنزلة حلويات الديماسي لي أول من ادخل المدلوقة والمهلبية إلى جبل عامل.

بدّك تقرأ مجلة بتحكي عن تاريخ جبل عامل ومواضيع فكرية وادبية أخرى...؟! أشتري مجلة العرفان التي أسسها الشيخ عارف الزين واللي كتب فيها علمان من أعلام النبطية هما الشيخ سليمان ضاهر والشيخ أحمد رضا ومحمد جابر آل صفا.

بدّك تسافر على افريقيا؟! شفلك حدا بيعرف حدا من النبطية مسافر أو قرابتو مسافر على افريقيا.

بدّك تنوّع فكري، سياسي، ديني، عرقي...؟! روح على النبطية.

شو بدّي أحكي ت أحكي عن النبطية ؟! سبّاقة في العلم، التجارة، الاغتراب... في حدا يمكنه اختزال التاريخ بمنشور؟ اكيد لأ، النبطية تاريخ وحاضر ومستقبل.

بالنسبةِ لي: "النبطية قلب القلب".

لم ولن تمحوا تاريخها...

مكة هي المكان الذي يُجذب الناس إليه.