سامحني يا بيي ما قدرت حققلك حلمك

هيدي حالتنا انا وعيلتي, ويمكن متلنا ومتايل. الوالد الله يرحمو هجر الخيام ع بيروت بعد ما ماتت امّو وكان بيو كمان ميت وكان صبي زغير وعاش عند خالتو ببيروت, وقتلوه الكتائب بحرب السنتين(1975)ببيروت.

كان الله يرحمو قبل مماتو يحلم بقطعة ارض بالخيام ولو نص دنم حتى يرجع على ضيعتو او يقدر يطل عليها ولو مرة وحدة كل سنة, لكن شاء القدر انو انقتل واندفن ببيروت.

بما انّو انا اصغر واحد من بين اخواتي ال 12 كان حلم بيي ما يروح من راسي خاصة لما كنت بالمدرسه واسمع من رفقاتي انو رايحين ع الضيعة مع اهاليهن, وكنت زور قبر بيي واوعدو انو بأذن الله بدي اشتغل وصمّض مصاري حتى اشتري ارض بالخيام ورجّع اسمك ع الضيعة.

كان عمري عشرين سنة وتركت لبنان وهاجرت متلي متل الشباب اللي عم يهربو من قلة العمل والبحث عن المستقبل افضل.

اشتغلت وصمّضن قرشين ولما رجعت ع لبنان اشترين ارض بوادي قيس (وادي شحرور) بالخيام تحت مزرعة التيتي, وبللشت بالعمار وتفاجئت انّو البلديه ما بتزفّتلي طريق بما انّو الطريق موجوده( طريق عام), والكهربا بعيدي عني من اقرب عمود حوالي 700 متر وعن الامايي حوالي 1400 متر, قدّمت طلب لتزفيت الارض من حوالي سنه وبتذكّر صارو بالبلدية يضحكو عليي عشان الطريق طويل 700 متر وما بزفتولي.

وقّفت العمار ورجعت على صور بلدة امي , و اذا ما قدرت حقق رغبة بيي انّو يرجع ع الخيام قبل مماتو, بتمنّى انو ابني يحقق حلمي ويرجعني ع الخيام حتى نام بقبري وانا مبسوط.

والسلام عليكم ورحمة الله

***

حسن محمد علي قاسم عواضه - صور