كانوا ولاد والسهل ملعبهم

كبروا بفي الحور

والدعى غيمهم

متل سباع الغاب

عا سيرة علي داحي الباب

شبوا عالمرجلة

طوعوا جبال الوعر

طحنوا الصخر

وعوج الشمس

حفروا اساميهم سطور مدهبة

ركبوا صهيل الويل

صاحبو عتم الليل

وتزنروا بالحدا

يسرجوا بعضهم متل الخيل

سنابك تلمع بايديهن

بعيونهن شرار

متل الجمر ..نار

بركان طايف عالدني بحب الحسين

على رووسن زرعوا تيجان

عصبات ملونة بالايات

محيكة بدٌعى الامات

زرعوا بالجبل بالسهل وعاكل مفرق طريق

رايات ملونة

مناديل

تلوح بالهوا

مراسيل

عشق وغرام وهوى

لصخرة المشتهى

للقدس الحبيب

بعيدة بعد رمشة عين

طولا سنين

وسنينها يا مسبحة

عمرها اكتر من ستين

مجبولة بالصلاة

معمدة بالانين

بعتولها بتموز

مكتوب في صورهن عصدور الحناين

صور عرسان ناطرين الكناين

يزفوهن عبيوت مرمر

سقوفها علو السما

حيطانها ياقوت احمر

قمار

متل السما وورق الشجر وزهر الهمس

تواعدوا اخر مرة التقوا

انو يسهروا اخر مسا

هونيك حدا قبة الدهب

عند بوابة السما

ياوعد

شايفينك متلك متل ضو الشمس