لا أدّعي حصرية حبّي للخيام فهو حسب إحساسي أكبر من هذا الكون.

وألخيام عندي ليست مجرّد أحرف تكتبها أناملي أويتغنّى بها لساني.

ألخيام روحي ودمي، طفولتي البريئة، ذكرياتي ألجميلة، ستبقى حيّةً فيّ لأنها تسكن روحي والروح كما تعلّمنا لا تموت.

..

في تلك المرحلة آلسوداء.. مرحلة خراب بيوت آلخيام كانت الشمس بالنسبة لي هيّ ساعي آلبريد ألأوحد والأمين أحمّله أشواقي بعد أن خذلتني حتّى ذكرياتي.

حمّلتها رسائل شفهية وكتبت لها بغصّة كبيرة رسالةً بعنوان

(إلى ضيعتي آلمهجورة)

يا شمس لمّا بتشرقي

بعد طول عتم الليل

وما يكون في بالك حدا

ولمّا عنّا بعيد بتمرقي

وبتشوفي علامات ألويل

وبيوت خربانة ماكلها آلردى

قولي عنّي صباح الخير

وخلّي ندى الصبح ينزل

ويا ليت دموعاتي يكونو ندا

صرخي وينكن يا أهل هالضيعة؟

ليش ما في صوت؟

وما رح تسمعي غير الصدا

وصوت الضمير يبكي

وحجار متروكة حزينة

بتصرخ ما في حدا

ألمقطع الثاني

بكعب الجبل في لنا كرم زيتون (كان لنا)

كسّري غصونو وفرّقي

بركي بلادنا بتعود

خايفي؟ حبّي لضيعتي بمون

كسّري ولا تقلقي

وخلّي كل غصن وعود

يدخل بيوت أهلنا بمرجعيون

وزهور على صدورهم علّقي

وإحملي من قلوبهم وعود

إدخلي ولا تفزعي الحب مابهون

وماتفكري حالك عم تسرقي

كرهنا الحرب وبنّا بالسلام نعود

المقطع ألأخير

وبجنب كل زيتونة في دالية

وعناقيد مستوحشة للناس

وصبيع اطفال تعصر الحبّات

والورقات تصرخ ليش الحقلة خالية؟

عجّل يا قاسي وقطّع بهالفاس

مش خايفي بس حابسي الآهات

بدّي اركض شوف السفوح العالية

هون تحت إجرين عم إنداس

وعلى غصوني يبست الورقات

وشكرا".assaadghosn@live.com