ويبكي القمر

صدفة..لقيت ورقة منسيّة من زمان..لونها تغيّر لأصفر مع النسيان.

وحتّى ما تبقى منسيّة هالصفحة بتحفظها معزّزة مكرّمة.

شمّيت فيها ريحة الحلا..وشفت رجّال بأول عمره..وبكل عمر

بيبقى الحلا هو الأساس..وبهالدني..كل النسوان حلوين..

بالشكل...بالأخلاق...بالهضومية..وفي حلا اكسترا..

بيجبر إبن الميّة يتغزّل ويكتب الشعر لأن الحلا هوّ

الإلهام الحقيقي.وملهمتي إسمها(سحر).

                        ويبكي القمر

لمحت بنت حلوي قالولي: سحر       وكثير يومها إنبسط منّي النظر

حوريّة صوتها الناعم حبس أنفاس       والقلب مظلوم عا شيبة الشعر إنقهر

إطلّعت بحالي قدّيش صرت كبير       وبهالعمر عا كلمة غزل بيدق الخطر

صرخت بالإيام العم تعمل سبق       يا ليت عمر الشباب كرمالها نطر

بعتقد..لو شفتها من زمان بعيد       كنت فرجيتها من عمري أجمل صور

العمر واحد ما بينقسم نصّين       هيِّ الحياة؟ أو الإيّام ؟أوقسوة قدر؟

علّيت وجِّي صوب الفضا البعيد       بعز الصيف نزل عا وجّيِ مطر

أتطلعت منيح شفت كل النجوم       وشي مدوّر بيبكي. .بيشبه قمر

لمّا شافها حمل قلبو بإيدو       وكثر ما دق قلبو جمّر وإنفجر