محمد.. يا نور العين

إسمك على إسم النبي

الله يحرسك ويحميك

يا هدية الرب إلنا

الله من عندو يخليك

يا زينة البيت

زوّدت الفرحة بقدومك

وزاد المرح والسرور،

حتى الحُب

صار إلو طعم تاني

يوم ما خلقت

بي عيدو.

من صغرك

حسّيت فيك شيء مختلف

فنان بقلمك وبتلوينك

بترسم كل شي

بتشوفو عيونك

بمهارة وثقة وإبداع.

ومِثل ما كل بَيّ

بيسمع لما بينسأل

عن المهنة المستقبلية،

سمعت منك

ولعك بالطيران

وبحلمك أنك

تصير طيار

تبرم الدني

شرق وغرب

وتكتشف قديش عالمنا

واسع ومتنوع.

إلك مني عهد

ما بخونو

أنو إسعى جهدي

لتحقيق أمنيتك

وأماني إخواتك

اللي ما بيفرقو عنك بالمحبة.

محمد .. يا نور العين

بقدومك

خليت جو البيت أحلى

وخليت إخواتك

يتنافسوا

مين بيحبك أكتر،

واليوم وبعيد ميلادك وعيد الحب

أشرقت شمس حب جديد

وزغردت البلابل

وزهّر الياسمين

ومن كل قلبي بتمنالك

العمر المديد

وتحقيق أحلامك وأمانيك.

..

*رائد حكمت طويل - الإهداء: إلى ولدي محمد بمناسبة عيد ميلاده الخامس بتاريخ 14 شباط (فبراير).

محمد.. يا نور العين

محمد.. يا نور العين

عقبال المئة سنة