- رائد حكمت طويل: ستّ الحبايب.. أمّي

أمّي ..

يا أجمل لحن ع شفافي

مبارك عليك عيدك

وعيد جميع أمهات الكون

هالعيد اللي بيهل علينا

مع أول كل ربيع

تا يأكد أنو ربيع العمر

ما بيبدا إلاّ من خلال الأم

اللي بتعبها وسهرها

بتنشيء الأجيال

وبتعمر الأوطان.

أمي ..

يا أغلى كلمة

قالتها شفافي

ويا أول إنسانة

شافتها عيوني

يوم ما طلّيت

ع هالدني

وجودك جنبي

عطاني القوة والثقة

ومنِّك إستمدّيْت الأمل

وبدموع عيونك وصبرك

تربّيت وكبرت

ومن دفا حضنك

زاد فيّي الحب والحنان،

حبك بيجري

متل الدم بعروقي

ومتل الهوا

اللي بيحتاجو صدري.

بيقولوا الدنيا أم

وأنا بقول

يا أمي إنت بنظري

كل الدني

ومهما جار عليّي الزمن

رضاك بيهَوِّن عليّي

وبيمحي كل آثار التعب

بيكفيني منك

دعوتك إلي بكل صباح

بالرضا والرزق

وهيدا عندي أغلى هدية.

يا أمي .. يا ست الحبايب

بعيدك وعيد جميع أمهات الكون

بتمنالك ومن كل قلبي

دوام الصحّة والحياة السعيدة

ويعيدو ربنا عليك لهالعيد

بمِيّة فوق المِيّة

وتبقي جنبنا عطول

منوّرة حياتنا

اللي ما بتحلى

وبتصير أحلى

إلاّ بوجودك يا حنونة.

*رائد حكمت طويل