الله يرحم أيام زمان

بتذكر من زمان

قبل ما الحرب

توضع أوزارها

وقبل ما تتهجّر الناس

من بلادها

كانت البساطة عنوان

وكانت الإلفة والمحبة

بكل مكان

تصحى الناس بكّير

وتبدا معها

قصة المشوار الطويل

زيارات تبدا

من أول بيت بالضيعة

تا توصل لآخر بيت

بآخر اليوم الطويل

فنجان قهوة مع إم فلان

وشوية حكي مع إم علتان

صحن تبولة وخسة

وشوية فراكة كمان

جبلتها الإيدين

عالبلاطة والمدقة الخشب

بصوتها الرنّان

والتحويجة واللحمة النية ..

الله يرحم أيام زمان

ضاعت العفوية

وضاعت معها الإلفة

وصارت الزيارة

ما بتظبط إلاّ بموعد

والفيقة بكّير

عفا عليها الزمان

وصارت الفراكة والتبولة

والكبة كمان

موضة قديمة

ما إلها مكان

وصارت بعالم النسيان

قدام المأكولات الغربية

اللي إنمحت عندها

ذكريات زمان ..

هلاّ هلاّ يا دني

والله يرحمك يا أيام زمان

قديش بحِنّلك الإنسان

بس ما بيقدر يرجعلك

خايف على مظهرو يتأثر،

إرجعوا يا ناس إرجعوا

عيشوا البساطة بكل معانيها

تا ترجع الإلفة والمحبة

وما نبقى كل عُمْرنا

نترحّم على أيام زمان.

..

*رائد حكمت طويل

(تصوير زينب جمعة - بنت جبيل)

إرجعوا يا ناس إرجعوا عيشوا البساطة بكل معانيها

وصارت الفراكة والتبولة والكبة كمان موضة قديمة ما إلها مكان

وصارت الفراكة والتبولة والكبة كمان موضة قديمة ما إلها مكان