كلنا باسل وباسل كلنا

علي كامل حمّود 7\9\2013 موقع خيامكم

في عيد ميلادي

.. في ذكراك الثالثه

كأنك بالأمس كنت معنا ، سهرانين سوى مع الشباب و للصبح ، لم ننسى تلك الأيام والسهرات ولن ننساها فهي بعد التصبر بالله عز وجلّ ما يخفف من لوعة الفراق.

أعود بالذاكرة لمرحلة الثانوية و الجامعه في الفترة بين (1997 – 2002)، كان لقاؤنا أنا وباسل و الشباب تقريباً كل يوم جمعه ، كنا نجتمع ببيت جدو لباسل ببيروت، نجتمع و عالموعد دون تأخير و قبل الخليوي و "الكول" و الـ "مسد كول" ، طالما نحنا موجودين ببيروت طالما رح نجتمع يوم الجمعه بعد الغروب لغاية يوم الأحد الغروب.

السهره كانت للصبح ، مش نميمه و حكي عالناس و أكيد مش نسوان و ضرب كاس ، كنا نلعب ورق تريكس و طرنيب و ليخا و استعمار و أربعتعش و سودانيه و بس ينقصو اللعيبه كنا نلعب "باصره". كنا نصلي الصبح و ننام ، أكيد ما كنا ننام كتير لأن أول واحد كان يفيق كان يفيق الباقيين ، مش زناخه و تقلت دم ، السبب كان عا قولتنا :"شو جايين تنامو هوون ، روحو نامو ببيوتكن ، و عندكن كل أيام الأسبوع تتنامو، قومو فيقو شوفو شو بدنا نتروأ" . كنا نقضي يوم السبت كلو سوى ، و بالليل بنرجع تنكفي السهره و لما صار في انترنت و ألعاب كمبيوتر عالنت ورك صارت سهرتنا : كونتر سترايك ، و سنايبر و أوت لووز و أكيد ما رح انسى "نيد فور سبيد" .

كنا خمس شباب (باسل و باسل و علي و علي و علي) الجمعه و السبت و الأحد لفترة بعد الضهر ما نفارق بعض أكيد إلا وقت ما بدنا "نريح ضميرنا" .

خلال الأسبوع كل واحد بمدرسته و بشغله و مستنيين نهاية الأسبوع تنجتمع سوى مره تانيه و عا هالحال طوال الفترة اللي عشناها بلبنان.

هيدا كان ببيروت و خلال دواماتنا المدرسية و الجامعيه ، أما بس كنا نطلع عالخيام و تقريباً ما كنا نفوت ولا عطله إلا ما نطلع ، السهره و القعدات الحلوة بالخيام بغنى عن التعريف و الكزدورة عا الشارع الفوقاني كانت كل يوم و ما في شي بيلهينا عنها. الترويقه عالبرنده مناقيش من عند "أبو الموس" و بعدها ركوة قهوه و نفس أرجيله "ما بيفهم" مع كزة برد من الهويات الحلوين المسقعين شوي. و الغدا مشاوي لحمه و شيش طاووق بخلطته السريه ، و العشا من عند سناك أبو طارق. كنا أنا و باسل و الشباب كل يوم سوى و الترويقه أو الغدا أو العشا أو تلاتتهن سوى مع بعض.

في عندي تلات نهفات بدي قولهن كل ما إتذكرهن بتذكر و بترحم على باسل :

النهفه الأولى :

مره كنا بالخيام عندي بالبيت و بدنا نتغدى، و عادة كنا نتشارك بالدفع للغدا ، اتفقنا أنا و باسل و شب تالت نجيب دجاج و نتبّلهن و "مشاوي و الشباب" ، باسل اضطر يروح مشوار و قلنا ما بيتأخر بيرجع قبل ما نبلش، زبطنا الغدا و وولّعنا و إجا باسل و تغدينا وكل شي كان تمام و إجا وقت الحساب ، عملنا الحسبه و طلع الحساب تمنتعشر ألف ليره لبنانيه على ما أذكر ، يعني بيطلع عالواحد ست آلاف ، المهم هو باسل سمع ست آلاف و قام قال : " ليش شو فييييي ، سندويشتين و قنينة بيبسى من عند أبو طارق بخمس آلاف و خمسميه ، ست آلاف عا شو" ، المهم رجع دفع متل الشاطر لأنه بيعرف إنه إزا ما دفع ما في غدا مره تانيه.

النهفه التانيه:

رحنا مره سوى عا "باب الحاره" مقابل القاروط تنعمل الجاكوزي و التكييس الخ الخ، قام باسل مزح مزحه مع شب هونيك من الموظفين و كان من الجنسيه السوريه على ما أذكر، مدري شو قللو الشب و قام باسل قللو :" عرفت شلون بمزح "، المهم بعد شوي وصلنا لمرحلة التكييس ، و إز سمعنا صريخ باسل و كنا بالغرفه التانيه ، طلع هيدا الشب يللي مزح معو هو نفسو المسؤول عن التكييس و التلييف ، و بما إنو ما عجبتو مزحة باسل قرر يشرح لباسل "شلون عرف" ويزود نسبة الخشونه بالتلييف شوي و نسبه سخونة المي و هو وعمبيغسلو شويه أكتر ، باسل تحمل خشونة التلييف بس طلعت الصرخه بس صب الميات السخنين عليه.

النهفه التالته :

سهرنا بمره من المرات للصبح و كنا بالخيام ، و بدنا نتروق ، قررنا إنو الترويقه تكون "سوده و الشباب" ، قام باسل و قال "خلص أنا بعرفهن و رح جبلكن أحسن سوده بلديه على كيف كيفكن ، نزلنا سوى عالمسلخ القديم و اللحامه بعدا عمتدبح ، فات باسل تيجيب السوده ، تأخر باسل ، يا باسل ما عا أساس أصحابك ، المهم جاب السوده و أكلناها و بعدين عرفنا إنو ما كانت بلديه كانت سودة خروف ّبيلا" لأن ما كان في غيرها و اللحام بايع كل السوده البلديه و ما بدو يفشّل باسل....... و هلأ كل ما أكلنا سوده بنتذكر خيي باسل و السودة البلديه.

تقريباً كل ما نعمل شي هلأ بنتذكر باسل و أفلامه و قصصه ،

و أخيراً ، بذكراك التالته بدي إختم و قول كلمتين:

* كلمه إلك: عمنحاول قد ما نقدر ننسى بس مش عمتزبط معنا ، عمنحاول نرجع نجتمع متل ما كنا لما كنت معانا أبداً أبدا مش عمتزبط ، الفراغ اللي تركتو كبير كتير و ما في شخص بالعالم بيقدر يملاه ، الله يصبرنا عا فراقك و يجمعنا فيك بدنيا الآخره ، دعواتنا إلك بالرحمه و المغفره

*وكلمه لإمك الغاليه :متل ما قلت لها و رح ضل قول " كلنا باسل و باسل كلنا" الله يمدك بصبر من عندو ، وتذكري مصاب سيدتنا زينب و تصبري بالله ، و الله أحيانا كتيره ما بحب زورك لأن بعرف إنو كل ما تشوفيني رح ينفتح الجرح يللي بعدو ما شفي و هييئتو ما حيشفى و رح يروح بالك لهونيك لعند الحبايب ! سامحيني يا غاليه إزا ما عمزورك متل ما لازم، الله يقويك و يطول بعمرك و يخليلك الشباب و الصبايا.

رحم الله من قرأ الفاتحه عن روح أخي ورفيق دربي باسل عبد الأمير حسان وجميع المؤمنين والمؤمنات.

* ابن الخيام، علي كامل حمود

موضوع: "مع رحيل باسل حسّان.. يحلّ عيد الفطر حزيناً وقاسياً على الخياميين"

موضوع: "يا أم أشرف صبراً..."

موضوع: "برحيلك باسل نفقد عزيزاً وعريساً لم تكتمل فرحته"

كلمات السيدة رلى ضاوي إلى الحاجة أم أشرف

سعيد اسماعيل: "صرخة موجوع + صور حادث السير الذي تعرض له المرحوم باسل حسّان"

بتول حسّان: "باسل وناديا.. كالعصافير كانا ونظرات الحب تحاكي عينيهما"

فادية خشيش: "عيد ٌوبأيّ حالٍ عدتَ يا عيد ؟"

أبو عصام محمد صفاوي: "باسل وهاني.. رجلان مكافحان ومعطاءان خسرتهما الخيام"

عبداللطيف عبدالله: "حكايتي مع رضا... فكيف كانت حكاية رضا مع باسل؟"

لينا القاعوري: "باسل.. فراقك صعب على الجميع!"