وعالمملكة شو مرق غيم ونسم هوا وشو شتت الدني و غطا ترابها التلج

ولاد الخيام / مهداة الى شهدائها

مملكة وناشرة خيامها

متل سما غير السما

مآدي ايديها عالدني

وبفيها ولادها

متل الزهر .... متل الدحنون اللي بمرجها

ولاد

عمرهن ورود

وشو بيشبهوا القمر

كل قمر بلون

ويا محلاهن هون

يزينوا بيوتهن

يعلوا عواميدها

ويلعبوا ....

بشو يبلعبوا ؟

كان عضفة النهر

في شوية شجر

فيهن يتخبوا الولاد

ويلعبوا لعبة الكبار

قواص.... وقصف

ويموتوا

ويضحكوا .....عقد ما ماتوا

ما بيموتوا ....بيضحكوا

وبس يخلصوا

يناموا عالصخر

تيصيروا صخر....... بيصيروا صخر

بيتعلموا من الحجر كيف

ما بيطلع الضفر من اللحم

يزينوا وجوهن

بزهرة الدفلى .... ويتصوروا

باصابيعهم يتصوروا

ويعملوا حالهن شهدا

بيوقفوا بهيبة

يتفننوا كيف تكون الصور

يرسموها

ليعلقوها عيحطان المدرسة

ويزينوا الشوارع

شوارع المملكة

ولاد

حدا بيئلك ولاد

وبس تغيب الشمس

يزرعوا الشوارع شيطنة

زغار

بيحبوا يلعبوا

و يضحكوا

وعالمملكة شو مرق غيم

ونسم هوا

وشو شتت الدني

و غطا ترابها التلج

والولاد

صاروا شباب

بعدهن بيتخبوا بالشجر

وبيلونوا وجوهن

وما عادوا يتصوروا

صاروا يتخبوا

صاروا يصاحبوا الارض

كل ما تشتي

بيصيروا وحل

مية نهر

نسمة هوا

كلها سكون

وما بتشوفهن عين

الا ما تصلي عالنبي

من صيبة العيون

صاروا عحفافي الخطر

يرسموا سنين العمر

ايام

كل يوم عمر

وساعة ما نده

صاروا الصدى

رد الجبال والوديان

عالهدى

دلون عاالطريق ...

مشيوا

وقت الصلاة صلوا

وكملوا .....

بتسمع الدعا لاحقهن

من تحت اجريهن

طالع عالسما

التراب داعيلهن

مشيوا بطريقهن

وعالطريق زرعوا حالهن

شجر زيتون ....تين وزهر طيّون

عطيوا الارض عمرهن

وزينوها

متل ما كانوا يعملوا بالصور

وطلعوا لحد القمر

وعملوا حالهن نجوم ... فوق المملكة

السما زينوها

قمار ونجوم عم يضحكوا

زهدي نصار

20/01/2015

قطر

ولاد عمرهن ورود وشو بيشبهوا القمر كل قمر بلون ويا محلاهن هون