مُزِجَت الدِّماء

اْندَلَق اللَّيل قِدّامنا قبل الشَّمس مَتغيب .. .. واتبَعثَرِت أيَّامنا لِم طَلّْ هَالوِجّْ الغريب

هَبِّت الأبطال شاهرِة سيوف الحقيقة .. .. مَنَعو القَدَر بِزنودهُن يُرضى النَّصيب

كان الغَدر عَميِسرُق دقيقة .. .. معها خطف بين الأحبَّة حبيب

آآآخ لمّا السَّهم بيصيب .

الهَمّْ انرَسَم عا وِجّْ إِمَّك .. .. لي ناطرة تشِمَّك

قلبا صرَخ صرخِة وَجَع .. .. صَرخَة حنونِة مخَبيي خَلفا الدَّمع

يِسكُب عوَهج النّار ويذوب الشَّمع

يِرسُم فخر عجبين هالبَيّْ العنيد .. .. البَيّْ لْحَمَل جَمر الوَطَن بالإيد

بَيّْ الكرامة بيّنا بيّْ الشَّهيد .

ترَكت عيلِة وارحَلت بكّير .. .. لِمعَوَّدي تضُمَّك وتِحمُل مَعَك هَمَّك

بِقيِت وحيدِة الهَمّْ صار كبير .. .. وبالقلب في غصَّة

بُكرا الطَفالا بيِسئَلو عَنَّك .. .. حَدُّن كِنِت رُحت وما عِدت رجِعت

مينَك إِنِتْ ما كِملِت القصَّة .. .. ولا تعَلَّمو مِنَّك .

اتجمَّعوا الإخوِة يوَدّعو الغالي .. .. بقلوب عبتذوب حنِّييِّ

يا حَصرَه كاويِة يا وَيل حالي .. .. إِختك بتِندَه ردّْ يا خييِّ

عَمبِسمَعَك لِم كِنت عَمتِحكي .. .. وتموج بين شفافَك الضُّحكِة

لْحَبُّو الدِّني بالقَدْر مش قَدَّك .. .. اختَرت الطَّريق عرِفت شو بدَّك

ترَكت الدِّني تِسقي ورد لبنان .. .. الوَرد اللّي كان عطشان

زَهَّر كرامِة وعِزّْ عاخَدَّك .. .. وعَميِرتِوي بدَمَّك

بالفخر واجِب ودّْعَك اللّه مَعَك .. .. اللّه مَعَك اللّه مَعَك

* الشاعر أبو علي العبدالله

تسجيل فيديو لقصيدة الشاعر أبو علي العبدالله "مُزجت الدماء" التي تسطّر التلاحم بين الجيش والمقاومة: