المرحوم علي عبد الحسن عواضة (أبو رباح)

الرحيل...مش نهاية...

الرحيل..بداية.

بداية مرحلة بتقيّم الإنسان...وبتفرجينا حجمو الحقيقي.

بالحياة..كلنا وراق بنشبه بعض...وبعد الرحيل في وراق بتغور بباطن الأرض..ووراق بتحملها الريح للملكوت الأعلى..ونيّال من ترك ريحة طيبة بهالأرض.

ما بكتب عن أبو رباح..كخال..ولا كشاعر..أنا خلقت ببيت أبو عبدو وتعلّمت فيه معنى الحياة..

علمني أبو عبدو فلسفة الحياة...وعلمني أبو علي معنى الكرامة...وعلمني أبو رباح..معنى الأنسانيّة.

بكتب اليوم إللي كل واحد عبالو يكتبو...عن أبو رباح الإنسان..والأخ صبحي القاعوري كفّى ووفّى.. من قلب محب.. وحقّاوي بدون تزلّف... أكيد عايش أبو رباح أكثر منّي... وكان أقرب لأبو رباح أكثر منّى ما صرلي إكتب قبل اليوم.. مع أنّي كتبت قصيدة بنفس توقيت رحيل :أبو رباح...واليوم وبالإيّام السابقة..

من ساعة الرحيل لبعد ذكرى الإسبوع...حسّيت إنو الخيام أكبر من الهند بعدد السكان...كثار من المحبّين شاركونا رحيل أبو رباح...ما رح اشكر نفسي..لأن

كل معزّى هو نفسي.

إنت زينة وفخر يا خالي

مليان عاطفي منّكش خالي

بيدعيلك القلب تسكن الجنّة

يا أطيب خلق الله يا غالي

بكتب اليوم والإلهام منّك

الشاعر إنت..وحزين موّالي

لمين تركت أبيات وقوافي؟

بتدمع عيوني لمّا تعنّ عا بالي

بحضن أبو عبدو كلنا ربينا

وأبو عبدو..بالأخلاق عالي

مثل عنتر كان حامل الريشي

وطربوش عا راسو بيشبه الهالة

بفتخر فيك وببّيك ...وجدّك

أخذت منكم حروف الشعر رسمالي

أسياد بالجنّة يا أطيب ناس

على محبّتكم ربّيت أحفاد وعيالي.

موضوع الحاج صبحي القاعوري "أبو رباح علي عبد الحسن عواضة.. إبن مدرسة الحياة"

موضوع فاطمة عواضة "إلى روح عمي وشاعري وطبيبي أبو رباح علي عبد الحسن عواضة"

سجل التعازي بالمرحوم علي عبد الحسن عواضة (أبو رباح)