صوتِك قبل الحكي مسموع

ومكتوب من دون الورق وقلام

قلو الجبل للسهل،وعَمهل

حنًى كفوفو وطل ليشوفو

كيف السهل بيِحلم بلا ما ينام...

الجبل عامل، عامل حرس للسهل

الجبل عامل، عامل حرس أحلام

أحلام تخيط وجوه وعبَا وعتم للًيل

سرج للخيل وحروف لَيِبدا الكلام

عن اّخر حكاية بقيت بالمراية

وقعت منا الوجوه، لكانت بَلا ايام،

أيام محسوبة عالوقت عدًاد

والوقت بلا رجالو بيصير ركام .

الوقت فرًخ بحيطان الحبس

لفًت شروشو رقبة الظلًام .

وقبل الفجر كل يوم بتصلّي مرا

بتدقّ عصدر النصر، بترقّ شمسات العصر،

بتعجن عتمات الحبس رغيف السلام .

ارضِك الحرّة يا ست خبرية ولاد

الأرض النا والتراب، والتاج للحكّام

صرخ جلّاد وتصدّع الهيكل

وصوت المرا مسموع مع صوت الرخام :

هَي مقبرة تيجانكم المكَسّرة

ياولاد الظلم وتاريخ من أوهام،

جنوبي الهوا، حرّ الهوا

أرضو السما ورجال ما بتنضام،

صوتكن بالمعتقل وحدو بقي

الأحرار صوتُن طيّر رفوف الحمام

ما بيِلفي عهالفضا الا النسور

وتحت التراب راسكن مثل النعام،

وان كان بفكر صهيون يعبّي هالهوا

ليعيش حكاية وهم بالانتقام

قلّلو بعيد الحلم وشو مستحيل

تنصب وتَد لَخيمتك بأرض الخيام !

* الشاعرة ماجدة داغر

الخيام 5-9-2015

..

(من الأمسية الشعرية للشاعرتين خاتون سلمى وماجدة داغر في نادي الخيام الثقافي الإجتماعي)

قصيدة خاتون سلمى "لأنكِ الخيام"

ألبوم صور الأمسية الشعرية في نادي الخيام الثقافي لخاتون سلمى وماجدة داغر