الكاتب أسعد غصن: يا عدلنا.. حرمونا من المي،من الكهربا، طمرونا بالزبالة...

مجنون يحكي وعاقل يفهم..إذا جايي عبالو يفهم.. مش عاير إذنو ..وفهمو.. لطائفتو ولزعيم طائفتو.

من لمّا خلقت البشريّة... وبنسمع إنّو العدل أساس الملك... بس عِنّا ما في ملك ولا أساس.. عشو العدل بدّو يوقف؟؟؟ كل شي مصادر...بنحكم حسب قوانين وأعراف هيي مقدّسي..بس عا قد ما حركشوا فيها...صارت بالية..القانون ..إلو مليون تفسير.. حسب الحاجة وحسب الطلب..مثلاً:

إذا 2 بنفس العمر.. إرتكب كل واحد جريمة بنفس المواصفات... البيّو فلان .. براءة مع تعويض

والبيّو مشحّر بيعفن بالحبس...بوسائل الإعلان المجرم الأوّل..بيحطّوا أول حرفين.. إسمو وإسم عيلتو.. والمشحّر:إسمو كامل وإسم بيو وجدّو وجد جدّو والسليلة ومن أي ضيعة او مدينة وشو لون شعراتو مع صورة شمسيّة.. والأنكى من هيك بيطلع بي المجرم الأوّل الحامل حصانة وبيهت المشحّر,,,وبيطالب بإعدامو...أيمتى أصحاب الحصانات بيتمثلو بالنائب البريطاني السابق..غلاوي..ترك النيابة لأن مرتو طلبت يسّرعوا بوراق الخادمة... وعنّا خادمة صاحب الحصانة.. بتقابل الوزير.. وبتنتخي عليه ووووووو؟؟؟؟؟؟هيك عدالة هالبلد.

وقع قزاز بمظاهرة الحراك الشعبي بسوق أبو رخوصة...قامت الدنيا وما قعدت... ليش؟؟؟

لأنّو أبو رخوصة وأمثالوا متحكمين بالبلد..

بوجّه كلامي للقضاء...حكامنا حارقين أنفاسنا من يوم الإستقلال...كل شي بيملكوه..سوليدير عملولا قانون..ونواب الحصانات عبّوا...وكل مشروع كبير بيعبّوا...ونحن بندفع..حيتان المال إشتروا العقارات المأجّرة...قانون الإيجارات التهجيري عالباب...قدّيش عبّوا...

يا عدلنا...حرمونا من المي.. من الكهربا... طمرونا بالزبالة... صادروا وسط بيروت.ديون عالشعب بحدود مية مليار دولار.. وبكرة بيرمونا بالشوارع... ولادن بيتوظفو.. ولادنا لأ؟؟؟؟

كل طايفي حاميي زعيما ولو عمل السبعة وذمّتها...

يتحرك العدل ...كرمال قزاز ما بيوسى ميّة دولار يمكن القضاء يعدم عشرة تنعشر شب..

وإللي فقّروا الشعب ونهبوا خيرات البلد..هنّي متحكمين مش بس بالعدالة..حتّى بالزبالة والغنمات ...حفيو إجريهن من الركض ورا الزعما...وورمت إيديهم من التزقيف للزعما

وبكرة مثل الشاطرين..بصندوق الإقتراع...؟؟؟؟؟؟

لازم هالشعب كلّو يفكّر هوّي...ويعرف مصلحتو..ومصلحة ولادو وأحفادو...وينزل يطالب

بحقّو بالعيش الكريم...المتنبّي قال لسيف الدولة:فيك الخصام وأنت الخصم والحكم.

عيش يا كديش...لينبت الحشيش.