الكاتب أسعد غصن: حبّيتك من زمان وكان عمري صغير. وبعدني يا حلوتي مثلك بالوفا واكثر

ربنا سبحانه وتعالى...لما خلق حوّا وآدم بهالكون كلّو...جمع الحب بين التنين.. وما كانوا بيعرفوا شو هوّي الحب...عالعشرة تآلفو...والحنّية لعبت دور أساسي.

وكل الرسل حملوا بقلوبن المحبّة وبشّروا فيها...لأنها بتوحد القلوب نحو الخير .وعمل الخير.

والحب متعدد الأوجه ...ما في داعي عد أنواع الحب...وكل هالأنواع ...كتب فيها وعنها الشعرا من يوم تعلّم الإنسان الحرف...والحب مثل الهوا والمي ما إلنا عنهم غنا عنّا بنستغرب لمّا شاعر فوق السبعين والثمانين أو أكبر شوي بينظم شعر حب وغزل

ليش؟؟؟؟بيقولوا قلب الإنسان بحجم قبضة الإيد...وبيقى هيك حجمو لآخر العمر...

وهالقلب ما بيبرد...مش لأنّو الدم سخن...ما بيبرد لأنّو مليان محبّة...

من حقنا نعيش كل أعمارنا...والغزل بيرجّع للقلب شبابو...وبعد عالعمر...إذا ما عنّا حب بقلوبنا بنموت بكّير...إتركونا نكتب عن الحب..ونتغزّل يمكن والله أعلم نعيش كم سنة زيادة...اليوم بالذات...كتبت كم سطر وبالعدد 6 ما حدا يتعدّى هالرقم خفيف نظيف...معبّر...والقاريء ما إلو خلق يقرا أكثر...وخير الكلام...ما قلّ ودل.

قلب.. وعمر

حفرت إسمك بقلبي..صار الإسم يكبر

والقلب مليان عاطفي صعب يتغيّر

..

كيف بدّي إمحي من القلب إسمك؟؟

وعند ما حبّيتك كنت وكان قلبك صغيّر

..

يا مصادرة عمري .. عمري إلك كلّو

والحبيب على حبيبو.. ممنوع يتجبّر

..

حبّيتك من زمان وكان عمري صغير

وبعدني بحبّك ولو بالميّة والعمر ختير

..

قلبي ممنوع يكبر كرمالك مع الإيّام

بعدني يا حلوتي مثلك بالوفا واكثر

..

ولو ذبحتيني..وتحول رمشك لسكين

دمّي بيكتب ..بحبّك ....بلون أحمر