شكرالله كرح.. وكانْ في طبيبْ: إيدَيه برشان الصليبْ صوتو دَوا أحمرْ خلصو دفاترْ طِيبتو،

كان الجنوبْ

كلما يجي يْلَحّن سَفر لدْروبْ

يوصالْ عَ باب الخيام يْدوبْ...

وكانو البيوت خْيام إخوه بْهالسهل

ترتاحْ

وتدور مَروحة القمحْ

ع مهلْ

فوت.. فوت فتاحْ

..

ولمّا الصبحْ يوعى من رْموشو

يركض ورا الفلّاح...

مايقدر يْحوشو..

يْعَلّي التراب وْيشرب شْلوشو..!!

ولمّا الشتي يرسم على قْماش الخيام زْياحْ

ويْقَنّص المِلّاحْ

أهل الخيام

بْضَيعة الإيّامْ

بيغَسّلو العتمه بِدعسات الحمامْ..!

تايْفيقْ آخد راحتو لِبْنامْ..

بْيتقاسمو مَنْقَل الحنّيّه

والشِعر تِكّاية السهْريّيّه..

شْلاحْ قلبَك بالقصيده شْلاحْ..

بْيتْضَيّفو والقافيه تفّاحْ

أحمر متل دمّ الزمان لْ راحْ

وْبَرّا الارض مابْتنعس شْوَيّي

وْحتى الشمس ماتْحَوّش الفَيّه

بْيفَيّقو نَومة الخبريّيّ

وْتلبس الخيمه.. جْناحْ!

//////

وكانْ في طبيبْ:

إيدَيه برشان الصليبْ

صوتو دَوا أحمرْ

خلصو دفاترْ طِيبتو،

يا طِيبْ:

عْملّو السهلْ دفترْ

صوتو دوا احمرْ

عينيه قدّاس الصليبْ

يْصرّ الاسامي بْصرّة الزعترْ

تمرق تبوسو الشمس هيّي وْعم تغيبْ!!

ياكَفّ شكرالله:

لْ حامل عطر الله

كنتْ متل الندر تتْجَلّى

نْ وقعت الخيمه توقَف مْحَلّا..!

وين شكرالله؟!

حاببْ تاإركعْ مطرح لْ صَلّى

وْخَبّرو:

حوّلِتْ ع بيروتْ

جيبا معي ما لقَيتها

بِبَيتها

دقّيتْ ع نوم البيوتْ

زْغيره الدني مْنين الوجع بيفوتْ..؟!

/////

يا جنوبْ

كل طير بْهالسهلْ مكتوبْ

يا ريت بتْجَمّع هَ المْكاتيبْ

ونروح نقْراهُنْ سَوا عند الطبيبْ

ونْعَلّق صْواتن بحنْجرة الهوا..

بلكي يا شكرالله

بتتْسَلّى..

..

قصيدة ألقيت في الأمسية الشعرية للشاعر جرمانوس جرمانوس في نادي الخيام الثقافي في 3 أيلول 2016

موضوع ذات صلة(تحيّه لَ روح شكرالله كرم (قصيدة))

موضوع ذات صلة(أمسية شعرية للشاعر جرمانوس جرمانوس في نادي الخيام)