عا سيرة العقل... ربنا أوجدو حتّى صاحبو يفكّر، يميّز الخير من الشر ويتصرّف صح...

تصوّروا هالعقل عوّدوه عالكسل صار في مستشارين

ومساعدين وأوصياء وووووألخ... حتّى ما عاد نعرف نجمع واحد زائد واحد بدون آلة حاسبة...

ولحد هون بحكي عن الطبقات (الهاي) من حكّام وزعما ومسؤولين وكل من لفّ لفّهم... وفي عقول مضطهدة ممنوع تفكّر إلاّ مثل ما بدهم أصحاب الحصانات وإلا!!.. الله يسترك.. بدّك ترضى بالواقع وإلاّ!!

زمان كنت إسمع إنّو هالبلد: بلد الإشعاع والنور... وحريّة الفكر وكل المضطهدين فكرياً كان ملجأهم هالبلد... اليوم مين بيسترجي يحكي عن الغلط؟؟

أو يقول: بلد الإشعاع والنور عايش عالعتمة...

كلّوا مصادر وإلاّ؟؟؟؟

حتّى الواحد يسلم لازم يمشي الحيط الحيط...ويا رب السترة وإلاّ؟؟؟

بعد شوي بيطلع كم واحد: هذا خنوع وبشجّع على إبداء الرأي ولو عا قطع الراس؟؟؟؟ إنتبهوا مش راسو.. راس صاحب الرأي...

ولمّا صاحب الرأي بيوقع إللي كان عم ينتقدو بيقول: الله لا يقيمو؟؟

لذلك رح إكتب كم سطر عن العقل؟؟؟؟

العقل زينة

بفيق الصبح..ما بيهمني عدّ أنفاسي

بيهمني أكثر.....يبقى العقل..بيراسي

صحيح النَفَس آخر ضيف بيغادر

بس فقد العقل كثيربيحمل مآسي

أوعى يا إبن آدم وإعرف سر الحياة

صعبي الكل يعرفك وإنت الكل ناسي

قالوا:العقل زينة......زينة الكلام

غياب العقل بيخلّي القلب قاسي

والقلب بياخذ من دماغك أوامر

بيفقد طيبتو وبيتحجّر مثل كاسي

الله يلطف بكل إنسان عاوج الأرض

ويبقى راسي مليان وتموت أنفاسي