قائد الجيش اللبناني العماد جوزيف عون

حضرة قائد جيشنا اللي منحب واللي ربينا على محبته ..

عم اكتبلك يا حامي الوطن باسمي واسم اختي نايا ..

..حبيت عايدك وقلك كل عام وانت والجيش ولبنان بألف خير وتضلك رافع راسنا بالنصر على الاعادي..

اسمحلي قلك يا بيي .. وانت بيي الابطال والشهدا .. واسمحلي خبرك قصتنا وخبيها بقلبك الكبير ..

من سنة ونص فقنا يوم العيد انا ونايا لنلبس تيابنا الجديدة وناخد العيدية من البابا، لكن البابا بقي يوم العيد نايم وما فاق ..

بابا انقتل يوم العيد .. والقاتل سرق بارودة الجيش وقتل فيها البابا !..

اليوم عم خبرك.. وعم اطلب منك تمسح دموع بعدهم ما نشفوا ..

وعم اطلب منك حقي وحق اختي وحق بيي !..

الي قتل بيي بعد ما انحكم وانا ناطرة حكم العدالة ..

المجرم الي قتل بيي اسمه علي خليل لمع مجرم تخبى بالجيش ليغطي جريمته وليحمي حالو.. وانا بعرف انو الجيش بيحارب المجرمين وما بيحميهم !.

المجرم الي قتل بيي بعتلنا من اسبوع عيدية ..

كتبلنا قصيدة من سجنو بالريحانية وهالقصيدة رح ابعتلك هيي .. وبهالقصيدة بيفتخر بقتلو للبييّ .. وبيفتخر انو تركنا والدموع بعينينا .. وانو يتمنا انا واختي ..

يا حضرة القائد يا حامي الوطن ..

عم طالبك بالعدل والعدالة .. وعم حلفك بدّم جدي شهيد ساحة الشرف بالجيش .. تاخدلي بحقي وحق اختي من الي قتل بيي ..

نور ونايا أحمد أسعد قانصو

نور ونايا أحمد أسعد قانصو