ليلى رحيّل: ما فينا نغش بالدوا.. ولا نقطع الدوا عن مريض السرطان...

بلبنان، عم يتحفونا بكل الإحصاءات، بنسبة الأمراض العالية عنا، عن مراتبنا المخيفة والمرحلة الخطيرة التي وصلنالها، عن مساواتنا مع أتعس دول العالم، ونحن "سويسرا الشرق"...

بلبنان، عم نشوف كل يوم قديش عم نخسر ناس بنحبهن بالسرطان.. وقديش عم يتعذب ناس وينوجعوا من ألم هالخبيث...

بس يكون عنا بكل بيت في سرطان...

ما فينا نضل مدمنين عالدخان.. مهووسين بأراكيل السرطان الدليفري بكل الزوايا وبكل البيوت...

ما فينا ما يكون عنا حالة طوارئ لنحمي ولادنا اللي عم تخلق مسرطنة...

ما فينا نتفرج عالتلوث بالمي والهوا والزرع وكل الأطعمة الضارة أو المعفنة أو المغشوشة...

ما فينا نتفرج عالنفايات بالشوارع وعالأبواب وبالأنهار والبحور والصرف الصحي المخلوط بميّة الشرب...

ما فينا نعتبر السمنة الزايدة والدهون صحة.. وهيي حمل وعبء سرطاني عالصحة...

ما فينا نوقف طوابير قدام وزارة الصحة بلا فايدة...

ما فينا نوقف عا باب المستشفى ما في محل.. وما في علاج إذا ما في دفع...

ما فينا نغش بالدوا.. ولا نقطع الدوا عن مريض السرطان...

بس يكون هلقد السرطان عنا...

قديش بيكون بلدنا عم ينازع.. قديش فتك فيه السرطان.. ونخر بكل ناسو الزغار والكبار للعظم...

قديش حبايبنا عم يموتوا... بلدنا عم بيموت... بغرفة إنعاش، ما فيها هوا.. ولا أوكسيجين.. ولا مي للحياة.. وبلا حسيب ولا رقيب ولا عين عم ترعى...

عم يموت وكل المسؤولين عنو.. همهن بحالهن مش حالو...