إبن بلدة القليعة المربّي الطموح الأستاذ عبدالله ضاهر

الكل بينادولو استاذ عبدالله بس انا بفتخر قلو بابا...

تقاعد من سنتين، بعد ٤٥ سنة تعليم مادة الفيزيا والكيميا، ولكن بسبب حبّو للتعليم بعدو بيدرّس مادة الرياضيات، بذات الشغف والحماس والفرح متل بداية مسيرتو المهنية....

مش لإني بنتو عم امدح في، بس بشهادة كل تلاميذو اللي دايما بيقولو عنو "احلى استاذ". بيحبون، بيعاملون متل ولادو، بيمزح وبيضحك معون...

مناسبة هالكلام، هوي القرار اللي اخدو مع بداية هالسنة انو يرجع لمقاعد الدراسة من جديد، من باب العلوم السياسية بالجامعة اللبنانية بصيدا...

كان قرار جريء، ولكن مش غريب على "بيي" اللي كل عمرو بيحب العلم وبيحب يحفّز الناس يتعلموا...

مش غريب على "الأستاذ" اللي رغم ميولو العلمية عندو آفاق سياسية واعلامية واسعة...

مش غريب على "جدو عبدالله" اللي رغم ال٦٦ سنة من عمرو، حاضر بذهنو وفكرو وحماسو اكتر من أي شاب، حتى اكتر منا نحن ولادو الأربعة...

بكل جدية، رجع يكون تلميذ بين تلاميذ كان للبعض أستاذون...

بكل اقتناع وفرح، وزّع وقتو بين تلاميذو قبل الظهر بمدرسة راهبات القلبين الاقدسين بمرجعيون وبين رفقاتو الجداد بالجامعة بصيدا.... بكل التزام، كرّس كل وقتو بالبيت للدرس...

كان تحدّي بالنسبة الو، بس كان أد هالتحدّي.... درسْ وامتحانات، واكتر من هيك تقديم مواد ما كان قادر يحضرا…

اليوم كان يوم الحصاد... نتيجة اكتر من مشرّفة... نتيجة خلّتو يفتخر بحالو وخلتنا نفتخر في...

“أستاذ جدّو" الوحيد اللي نجح بتفوّق بالمواد الستّة اللي قدّمون من اصل سبعة، وتأهّل للفصل التاني بكل جدارة واستحقاق واعجاب من أساتذتو وزملاؤو...

بابا منفتخر فيك...

كل عمرك مثال اعلى النا...

كل عمرك مميّز بكل شي...

كل عمرك بتحب العلم ويوم اللي تقاعدت قلت رح ارجع اتعلّم... كنت أد كلمتك... أثبتت للكل اليوم انو العمر ولا مرة بيكون عائق لشي... انت المعروف بروحك المرحة متل الشباب....

بابا منحبك كتير وعقبال الأعلى...

* ملاحظة: هودي الصور اخدتون "سرقة" الو هوي وعم يدرس.

موضوع ذات صلة: محمد صفاوي.. طُموح في العلم لا يتوقّف عند حدود

--------- ---------- ----------

إدارة موقع خيام دوت كوم تتمنى للمربّي عبدالله ضاهر العمر المديد بالصحة والنجاح والعطاءات الدائمة..

إنه فخر لعائلته ولنا جميعاً، وهو نموذج رائع يُحتذى به للإنسان المثابر والمعطاء.

إبن بلدة القليعة المربّي الطموح الأستاذ عبدالله ضاهر