صَريخ القَلب مجروح عَبلادي .. .. وبَياض الثَّلج أَسوَد عا رمادي

وصَوت الحُزن بالوادي بينادي .. .. اْرحَمو لبنان يا ملوك الخَراب

دَخلَك يا رَبِّي مَوجوع .. .. بإِسم الشَّعب اللّبناني

بِعيونُن مِش باقي دموع .. .. شْريعِة غاب وفَلتانِة

عِنّا ذيب بهالحارة .. .. كِلّْ ليلِة بيعمل غارة

راحو دجاجات الجّارة .. .. قلبا بيِبكي زعلانِة

بْحِرفِة بيِلعَب عالقانون .. .. هَلَك النّاس ومِش مَمنون

بيِمرُق بالمَوكب مَجنون .. .. بِتقول حَرب وولعانِة

عالعَتمِة قَضَّينا سنين .. .. وبالشَّتوِيِّة بردانين

اللَّه يعينُن المساكين .. .. مِن اللِّي نفوسُن جوعانِة

المَيّْ لعِنَّا مَقطوعَة .. .. والأَرض لمِش مَزروعَة

بيِكفي صار لازِم نوعى .. .. ونُرفُض حُكمْ الإِهانِة

من اللِّي خانوا الأَمانِة