الكاتب أسعد غصن

اول مرة بكتب عا صفحة خيام دوت كوم الكريمة بشي من الخوف.

اكيد إللي كتبتو حلو لأنو نابع من قلب ابيض وطاهر.. كان وبعدو.

كثار رح بيقولوا: العالم عم تفتش عرغيف الخبز واسعد غصن عم يبحبش بدفاتر جدو العتيقة، علما انو اليوم لازم نرجع بفكرنا واحلامنا للماضي الحلو، نهرب من عفنة الحاضر المقرف...

المحبة اساس وجود الكون.. والحب الطاهر بالماضي وشم بقلوب كل المحبين.. كان الحب من القلب...

من الوجدان صار تبادل مصالح...

كنا بذنب العين نتطلع.. اليوم بكل عين جامدة...

الحب بيبقى حب مهما تغير الزمن ونيال كل واحد عندو ذكريات مع حبيبة من ماضي الطفولي والشباب...

ولتريحوا اعصابكم بتسونامي القهر والمصالح فكروا مثلي وإرجعوا بالخيال.

كتبت صبيحة 28.10.2021.

الحبّ الطاهر

شافتني غطت عيونها بيكمها

خافت عليي لما مرقت إمها

وتلمح وجها بلون الورد

حمر خجل وتحرك دمها

اكيد بتزيد دقات القلب

وشو ما صار ما بيهمها

بس عا إيامنا كان العيب

بتشوف الوردي وما تشمها

ما كان زمنا زمن حرمان

كنت يا مغرم بالروح تضمها

وتحافظ عليها من كلام الناس

الحب راحة مش زيادة همها