وريد القلب يا خيام

انا مش قصدي شى

عم بنطر التكات والدقات والساعات

كل يو م بقول بكرا

انا مش قصدي شي

بطّلع حواليِّه ما بلاقي شي بيشبهني

وقِف العقل و تعطلت كل الحواس

وما طالع معي شي

ضايع بين المباني والثواني والصوَّر

تايه متل عصفور مش لاقي مفر

ناطر وبعمل حالي قادر على بعدك المُر

يا خيام عم جرِب لاقي بديل

ما بيشبهك الا انت

لا مكانك لا سحرك قاعدي على تليْن

حاميكي سهلين

المرج و الوطى حُراسك من العين

جبل الشيخ ساندك حامل همك رافع رايتك

انا مش قصدي شي

شو بخبرك يا خيام

شو بقلّك تا قلّك

عا غيابك غابت الدني و نسمات الفرح وضحكات اللي كانت من القلب بقيت معك

عم تبعدي كل يوم اكتر من قبل

ناطر وبطّلع بعيون اللي متلي ناطرين

بلاقي ضياع و شتات وقهر

نحنا اللي كنا فيكي شامخين ورح نضل

بس في غصه لا مش غصّه

في كسره وخيبة امل

انا مش قصدي شي

بس ليش النَفَس صار عم بضيق

والاوكسجين انقطع عا غيابك

ليش اللي كنا نشوفهن أمل صاروا يأس

واللي كنا نشوفهن قراب صاروا أغراب

قولك وجودك كان محلي الدني؟

مغطي عيوب الناس وساتر على زلاتها

نيال يلي كانوا اقربلك من الوريد وبعدهن صامدين

اقوى من الخوف والوجع باقيين ما بينفصل قلبهن عن الوريد وانت الوريد

وريد القلب انت يا خيام

ايناس محمد عبدالله

٣٠/٤/٢٠٢٤