المرحوم الحاج جودات نصار

-1-

شِلح بيي قميص التعب

وارتاح

وحط عمرو عالطاولة

مِن جبينه

نبع لولو العمر

قطر الندى

شربناه

وعرفنا طيب العرق

والحلاوه

بس اولكن تأخرنا يا شباب

بعد ما هب الهوا وسكر الباب ؟

-2-

ع مخدة بيضا

ترك خطوط وجو

وما حكى حكايتو لحدا

راح مع اذان الضهر

وترك خلفو كومة رضى

ودُعى بتسمعو من عيونو

ومن تمتمة شفافو

وساعةخلص الحكي راح

و سكر الهوا الباب لوحدو

-3-

خمسين سنه

وما عِرفت بيروت تصاحبك

متل ورقة تين عا وج المي

تايه بشوارعها

تركض ركض العمر

ولا مرّا التفت

ولا تركت الندم يلحقك

من يومٍ عرفتك امك

وانت عارف شو بدك

متل كتاب حروفو

محفورا عالورق

لا بتنمحي ولا بتبور

بابور البحر

شو غنالك وشو عنّ عابالك

لكن صيصان بيتك

ما طاوعك قلبك

الا يضلوا تحت جناحك

جناح الملاك

يا بايع العمر كرمالنا

شو نفع العمر بلاك

-4-

زيت ومي

ووقفة تحت ميزراب السما

شو جابرك؟

غيرنا

نحنا يللي ما منعرف

الا انك بيّنا

كيف ربيتنا؟

هلق بعد ما انقطع الخيط

عرفنا

مين نام على باب البيت

ومين ما نام وقت الوجع

هلق عرفنا

بعد ما تسكر وراك الباب

-5-

ولاد يلعبو لعبة الحرب

والهم عابابك

لا يوم فات

ولا فل من قدامك

نص العمر

عُمر

ويا عُمر شو فاتك

لو فليت.... كنت اتهنيت

بس مين بيترك بلادو ؟

انت....؟

هيهات

انت يللي ربيتنا عالموت

بعدا لعبة الحرب موجودة

وولاد ربيتن....

عاسيرتك كتافهن مسنودة

-6-

منقعد نجمع خبار

منلملم حروف وكلمات

تيصيرو قصص

وقصايد فلتانة من شفافك

خليتها إلك

قلت مش حلوة

يقراها حدا غيري انا

لأني بعرف خباياها

حمّلتها للهوا

وطار فيها للجبل

هونيك بيت البطل

سمعو ياها وحدوا

وما حدا حدو

بعرف بينك وبينو حكي

جبل وقبالو بطل

هيك الكبار

صخر ونار

وهوا

يرفع اخباركن

للسما

-7-

عا مخدة بيضا

بلحظة

خلص الوقت

وكل واحد لحالو راح

ما حكيت شي

فليت

وبقيت حدك لحالي

متل طفل زغير

داير على أهلوا...

.......

ولك خدوا عمري

وكل السنين

ورجعولي ياه لحظة

لقلو اديش أني بحبو

.....

راح

.....

فضي التخت

و هب الهوا

......

وسكر الباب لحالو

الى روح المرحوم الوالد الحاج جودات نصار

قطر 7 / 8/2009

زهدي نصار