رجعت الليالي الفاضية.... تنهي ليالينا

ما رجع معي قنديل الليل

ضلو هونيك سهران مع جيرانو

حد الجبل..... يضوي عالشجر

على نبعة المي

بيرسم صورتو على وج الدردارة

بيتمارى فيا

بيضوي للسمك... حتى يسهرو

.....

هونيك تحت قرميد الضحك

على سطيحات الحكي... السهر احلى

هونيك الضحك من القلب

والحكي بيطلع من العيون

هونيك الليل مالو وقت بيجي وبيروح

ما حدا بيسألو

جار الجبل عالاكيد عزموا السهل على فنجان قهوة

والعزيمة ما بتنرد

عيب ما يقعد مع الهوا يتسامروا

تخمين فليت وما سلمت

حتى رجعت وحدي

......

فاضية

بلاد فاضية

عجقة الناس غريبة

وجوه ما بتصبّح على بعضها

ولا ايدين بتسلم

والشبابيك محزونة .... مسكرة

ما في حدا يدلعها بنظرة حبيب

ما في مناديل تمسح دموع العذارى

مناديل ما بتعرف التلويح

لا بالفرح لا بالحزن ولا بفراق العزيز

غريبة

بلاد غريبة مشغولة بالشمس

.....

شو بدو يعمل هون جار القمر

خليك هونيك يا صاحبي

برفقة أهل السهر

عالتلالي سرحان

ما في هون غير الضجر

زهدي نصار

قطر

زهدي ونور نصّار